கீழேயுள்ள சட்டகத்தில் பாடசாலை நிகழ்வுகளின் நிழல்களை நீங்கள் விரும்பியவாறு முன்புறமாகவோ பின்புறமாகவோ நகர்த்திப் பார்க்க முடியும்

May 7, 2016

அவுஸ்திரேலிய அரசின் நிதி உதவியில் இயங்கும் ‘துயர் துடைப்போம் அமையம்’ வளலாய் அமெரிக்கன் மிசன் தமிழ் கலவன் பாடசாலை மாணவர்களுக்கு தை மாதம் 27ம் திகதி 2016 அன்று கற்றல் உபகரணங்கள் வழங்கிய நிகழ்வின் கைபேசிப் பதிவேற்றங்கள்

சித்திரை 29 ம் திகதி வளலாயிலிருந்து கிடைக்கப் பெற்ற விபரங்களைத் தொடர்ந்து துயர் துடைப்போம் அமைய முகநூலில் பகிரப்பட்ட,  மாசி 17ம் திகதி வளலாய் அமெரிக்கன் மிசன் தமிழ் கலவன் பாடசாலையில் நடைபெற்ற மெய்வல்லுனர் திறனாய்வு 2016 நிகழ்வு தொடர்பான படங்களும், வளலாய் மண்வாசத்தில் பகிரப்பட்ட, வைகாசி 2ம் திகதி பாடசாலை மீள ஆரம்பிக்கப் பட்டபோது, தற்போது பாடசாலை இயங்கும் வளாகத்திலுள்ள ஆலடி பிள்ளையார் ஆலயத்தில் பொங்கலுடன் சித்திரை வருடப்பிறப்பு கொண்டாடப்பட்ட படங்களும் இணைக்கப் பட்டு தானியங்கு படக்காட்சி புதுப்பிக்கப் பட்டுள்ளது. 2ம் திகதி இடம் பெற்ற நிகழ்வில் அதிபர் ஆசிரியர்களின் புது வருட மகிமை என்ற தொனிப் பொருளில் வழங்கப்பட்ட உரைகளுடன் கைவிசேச நிகழ்வுகளும் இடம் பெற்றன. அதனைத் தொடர்ந்து ஆசிரியர்கள் மாணவர் களிடையே இனிப்பு பண்டங்கள் பரிமாறப்பட்டு, மாணவர்களின் கலைநிகழ்ச்சிகளுடன் விழா இனிதே நிறைவு பெற்றது. 

April 29, 2016

வளலாய் – தாய்நிலத்திலிருந்து … … …
யா/வளலாய் அமெரிக்க மிசன் தமிழ்க் கலவன் பாடசாலை

130 வருட கல்விப்பாராம்பரியத்தைக் கொண்டிருந்த யா/வளலாய் அமெரிக்கன் மிசன் தமிழ்க் கலவன் பாடசாலை, இலங்கையில் நடைபெற்ற உள்நாட்டு யுத்தத்தினாலும் இராணுவ பாதுகாப்பு வளயத்தினுள் வளலாய் உள்ளடக்கப்பட்டதாலும் ஏறத்தாழ வளலாய் கிராமமே முற்றிலும் இடம் பெயரும் நிலைக்கு தள்ளப்பட்டதாலும்  பாடசாலைக்கட்டடங்களும் குண்டு வீச்சுக்களுக்கிலக்காகி சேதமடைந்த தாலும் சுமார் இருபத்திரண்டு வருடங்களுக்கு மேல் இயங்காமல் இருந்தது. வளலாய் கிராம மீள்குடியேற்றத்தைத் தொடர்ந்து  வளலாய் மேற்கு மீள்குடியேற்ற செயற்குழுத் தலைவர் திரு. செல்லப்பு துரைரத்தினம் அவர்கள் மற்றும் ஓய்வுபெற்ற உள்ளுராட்சி உதவி ஆணையாளர்  திரு வைரமுத்து கந்தசாமி அவர்கள் ஆகியோரின் வழிகாட்டலில் வளலாய் மக்களின் தொடர்ச்சியான போராட்டங்கள், அதிகாரிகளுடனான சந்திப்புக்கள், அதிகாரிகளுக்கு எழுதப்பட்ட கடிதங்கள் போன்ற விடாமுயற்சிகளினால், இறுதியில் சித்திரை மாதம் 21 ம் திகதி 2015 இல், மாகாண கல்விஅமைச்சர் மாண்புமிகு குருகுலராஜா அவர்கள் தலைமையில், வளலாய் சனசமூக நிலைய பொதுமண்டபத்தில் சில மாணவர்களுடனும் நான்கு ஆசிரியர்கள் மற்றும் அதிபருடனும் மீண்டும் ஆரம்பித்து வைக்கப்பட்டது. இவ்வாறு ஆரம்பிக்கப்பட்ட இப்பாடசாலை தற்போது 50 மாணவர்களையும் ஏழு ஆசிரியர்களையும் கொண்டதாக வளர்ந்து ஒரு வருட நிறைவைக் கண்டு முழு வீச்சில் இயங்கி வருகின்றது. சுமார் 35 மழலைகளுடன் தனித்து இயங்கி வந்த பாடசாலை முன்பருவக்கல்வி கற்பித்தலும், தற்போது இப்பாடசாலையுடன் இணைந்து இயங்குகின்றது. இந்திய அரசின் நிதி உதவியுடன் இவ்வருட இறுதிக்குள் இப்பாடசாலைக்கென புதியதோர் கட்டடம் அமைத்துக் கொடுக்க இணக்கம் காணப்பட்டுள்ளமை மேலுமொரு மகிழ்ச்சியான செய்தியாகும். குறுகிய காலத்தில் இப்பாரிய வளர்ச்சிக்கு வித்திட்ட அதிபர் ஆசிரியர்களின் அளப்பரிய சேவையும் அர்பணிப்பும் பாராட்டப்படவேண்டியதொன்றாகும். போதிய நிதியின்மையால்  ஒரு வருட நிறைவு பாடசாலை மட்டத்தில் மாணவர்களுக்கு நினைவூட்டும் நிகழ்வாக கொண்டாடப்பட்டது. பாடசாலை வளர்ச்சிக்கு தங்களால் இயன்ற உதவியை வழங்குமாறு பாரெங்கும் பரந்து வாழும் புலம்பெயர் வளலாய் உறவுகள் கேட்கப்படுகின்றனர்.

முதல் பக்கம் அடுத்த பக்கம் முகப்ப